Perberesit:
Mish viçi gjelle (250 gramë)
Presh (1 fije të plotë)
Qepë e njomë (dy fije)
Speca (2 copë nga ata për t’u mbushur)
Spec djegës (1 copë)
Domate (2 kokrra të mëdha)
Karrotë (1 copë e madhe)
Finok (gjysëm kokërr)
Hudhër (1 thelpi i madh)
Ulli kokërr pa bërthamë (10 copë)
Gjizë (dy lugë gjelle)
Dafinë (tre gjethe)
Majdanoz (1 tufë)
Verë e kuqe (1 filxhan çaji)
Vaj ulliri
Piper i zi i bluar
Arrë moskat
Kripë
Pergatitja:
Mishin e gjellës e lëmë 20 minuta në tenxhere me presion vetëm me ujë dhe pa kripë. Më pas e qërojmë nga dhjamrat dhe dellërat, nëse ka dhe e presim në copa të vogla kubike.
Në një tigan ngrohim vajin e ullirit me thelpiun e hudhrës. Shtijmë copat e mishin, specin djegës, ullinjtë pa bërthamë, gjethet e dafinës dhe hedhim kripën. Më pas shtojmë preshin, qepën e njomë të prerë hollë.
Vazhdojmë kavardisjen me zjarr të fortë. Hedhim karrotën, finokun të prerë hollë dhe vazhdojmë kavardisjen. Shtijmë piperin dhe arrën moskat. E shuajmë masën që po skuqim me verë të kuqe. Presim sa të avullojë alkoli. (Besimtarët islamë sipas meje mund të përdorin verën në gatim, se avullimi i alkolit ndodh përherë, por nëse nuk kanë besë le ta lënë fare, megjithatë është e njëjta logjikë si për uthullën, e cila ka alkol gjithashtu).
Domatet i kalojmë në një rende, kështu që përfitojmë lëngun dhe mishin e tyre, por kemi hequr qafe lëkurën. Domaten e grirë e hedhim në tigan. Ulim zjarrin dhe presim që domatja të bëhet njësh me masën tjetër. Në fund shtojmë specat e prerë hollë dhe pas një minuti fikim zjarrin.
Kemi ndezur një furrë të ventiluar në 200 gradë. Në tigan shtojmë dy lugë gjizë të bardhë dhe e përziejmë me kujdes. Në një tavë dheje hedhim masën në fjalë dhe shtojmë lëngun e mishit që na ka tepruar në tenxheren me presion. Grijmë pak djath parmixhano ose kaçkavall dhe tavën e fusim në furrë për gjysëm ore.
